Bhimalapuram.co.in
అన్నమాచార్య కీర్తనలు -11935
మగవాడు భ్రమసితే మగువలు దెలిపేరా
రాగము: మధ్యమావతి
మగవాడు భ్రమసితే మగువలు దెలిపేరా | |
తగులై వుండఁగానే తలఁచకుండుదురా | ॥పల్లవి॥ |
కడుఁ జల్లనిచూపుల కాంత నిన్నుఁ జూడఁగాను | |
యెడలేని కాఁకలు నీకేల రేఁగెను | |
వుడివోని కొనగోర నూఁది యెచ్చరించఁగాను | |
అడరి నివ్వెరఁగులు అమరునా నీకు | ॥మగ॥ |
సంతోసపుమాటలు సతి నీతో నాడఁగాను | |
ఇంతలోనే వెడచింత లేల వచ్చెను | |
వింత వింత నగవులు వేమారు నవ్వఁగాను | |
చెంతనుండి పంతములు చెల్లునా నీకు | ॥మగ॥ |
వాడికకాఁగిట నిన్ను వనితఁగూడఁగాను | |
యేడలేని తమకము లేల వచ్చెను | |
యీడనె శ్రీవేంకటేశ యీకె నిన్ను మెచ్చఁగాను | |
ఆడుకోలు బీరములు అందమౌనా నీకు | ॥మగ॥ |
కీర్తన విభాగము ఆంగ్లము తెలుగు తెలుగులిపిలేదు