Bhimalapuram.co.in
అన్నమాచార్య కీర్తనలు -7163
కొంత నిలుపఁగరాదు కొంచేవు వొక్కమారే
రాగము: మాళవిగౌళ
కొంత నిలుపఁగరాదు కొంచేవు వొక్కమారే | |
యిఁ(యిం?)తాఁ దీరిన మరి యేమిసేసేవే | ॥పల్లవి॥ |
కొప్పు వీడినదాఁకా కుచము లదరుదాఁకా | |
యిప్పుడే అంత నీవు యేలనవ్వేవే | |
రెప్పలణఁచినదాఁకా రేవులురేవులుగాను | |
అప్పటిఁ దప్పక నన్ను అదేల చూచేవే | ॥కొంత॥ |
పెదవు లెండినదాఁకా చెదరేయేలుఁగుదాఁకా | |
మదముదొలఁక నేల మాఁటలాడేవే | |
నిదుర ముంచినదాఁకా నివ్వెరగందినదాఁకా | |
సదమదమై యేల సరసమాడేవే | ॥కొంత॥ |
నిండాఁ జెమరించుదాఁకా నిట్టూర్పు రేఁగిఁనదాఁకా | |
అండనే రతులనేల అలఇంచేవే | |
పండినశ్రీవేంకటాద్రిపతి నేనే కూడితిని | |
పండే మంచ మెక్కేదాఁకా పదరనేమిటికే | ॥కొంత॥ |
కీర్తన విభాగము ఆంగ్లము తెలుగు తెలుగులిపిలేదు