Bhimalapuram.co.in
అన్నమాచార్య కీర్తనలు -8676
తగినట్టే మెలఁగితే దైవమైనాఁ గరఁగును
రాగము: పూర్వగౌళ
తగినట్టే మెలఁగితే దైవమైనాఁ గరఁగును | |
వెగటుగా నడచితే విసిగించు వలపు | ॥పల్లవి॥ |
చేసినట్టే సేయవయ్య సేయకుమంటే నంత | |
వేసరుకొందువో ఆండ్లు వేవేలు నీకు | |
ఆసపడ్డదాన నేను అయినంత మేలే చాలు | |
వాసులెంచ బోతేను వడిఁబడు వలపు | ॥॥ |
ఆడినట్టే ఆడవయ్య ఆడకుమంటే నెంత | |
జాడ తప్పుదువో పెక్కుసతులు నీకు | |
తోడఁ బెండ్లికూఁతురను దొరకినంతే చాలు | |
పాడి పంతాలకుఁ బోతే పచ్చిదేరు వలపు | ॥॥ |
చూచినట్టే చూడవయ్య చూడకుమంటే నెంత | |
యేచి తమకింతువో నీకింతులు శాన | |
కాచుక శ్రీవేంకటేశ కైకొని నన్నేలితివి | |
వాచవి మోవడిగితే వన్నె కెక్కు వలపు | ॥॥ |
కీర్తన విభాగము ఆంగ్లము తెలుగు తెలుగులిపిలేదు