Bhimalapuram.co.in
అన్నమాచార్య కీర్తనలు -8798
తనివారఁ దిరువ నందలముసేవ నేఁడు
రాగము: శంకరాభరణం
తనివారఁ దిరువ నందలముసేవ నేఁడు | |
అనువుగా సేవించరో అమరులు ఋషులు | ॥పల్లవి॥ |
యెదురుగాఁ గూచుండి యిద్దరు నందల మెక్కి | |
కదిసి మీఁదఁ బన్నాగము గట్టించి | |
ముదమున నొండొరులు మోములు చూచుకొంటా | |
యిదివో దేవులు దేవుఁ డేఁగేరు వీధులా | ॥తని॥ |
చదురులమాఁటలు సతు లాడఁగా వింటా | |
వుదుటునఁ దమ యంగా లొరయఁగను | |
అద నెరిఁగి మోవుల నంతలో నవ్వులు నవ్వి | |
యెదు రెదుర దంపతు లేఁగేరు వీధులా | ॥తని॥ |
పొదిగి యలమేల్మంగ పూఁచి కాఁగిలించఁగాను | |
కదలక కూడీ శ్రీవెంకటేశ్వరుఁడు | |
అదివో యాతఁడు మెచ్చె నాతని నాపె మెచ్చె | |
యెదిగి నగరిలోనె యేఁగేరు వీధులా | ॥తని॥ |
కీర్తన విభాగము ఆంగ్లము తెలుగు తెలుగులిపిలేదు